JUBBBLASAMTÖKIN

Ljóðsköp og yrk III

2006-01-20T11:27:00.000Z

e. sr. Tyrfing T. Tyrfingsson

Kotbóndinn Einar á Látralæk þótti hnyttinn í kveðskap sínum en margir hafa talið hann marka upphaf þverskeytluformsins, ekki síst eftir að Björn Egils frá Þvagbæli í Biskupstungum lést, þjóðveldisárið 1944. Sem dæmi um þverskeytluháttarbragarformið má nefna þess þverskeytlu sem samin var í tilefni af því að Bergur móðursonur hans varð fertigur en hún hljóðar svo:

Bergi verður bráðum hlýtt
hlýtt bráðum verður Bergi
Hvergi verður honum strítt
strítt honum verður hvergi

Ef vel er að gáð sést að myndmáls er fullt af lúmskum húmor Einars en hann var frægur fyrir húmor sem enginn tók eftir. Hér er rétt að skoða annað dæmi svipað en það er veðurfarslýsing sem hefur að geyma hart ádeiluklám undir niðri, ort snemma á áttunda áratugnum;

Aldrei situr ærin kyrr
einkum þó að neðan
Það er reyndar ekki fyrr
en nálgast haustið

Góðar stundir

Rannsóknir á skjölum dr. Þórarins Bergbergs

2006-01-18T19:16:00.000Z

e. Emel Finnbogason

Við rannsóknir á skjölum dr. Þórarins Bergbergs húsgagnasmiðs, sem lést árið 1995, hefur komið í ljós að hve mikið safn af gögnum hann hafði undir höndum hvað varðar málverk Leonardos DaVinsis, Monu Lisu. Alla tíð hefur reyndar verið vitað um rannsóknarstörf hans í þágu lista og menninga en ekki hefur mikið borið á þeirri vinnu hans, þótt menn hafi ætíð vitað um áhuga hans á því einstaka málverki. Rannsóknavinna dr. Þórarins var langt á veg komin er hann lést og vann hann að skýrslu um kenningar sínar hvað varðar hið leyndardómsfulla bros Monu. Því miður er ekki unnt að birta niðurstöður þessara rannsókna hans sem voru á lokastigi en margir fræðimenn hafa bent á að einungis hafi átt eftir að klára og gefa út skýrsluna. Í skýrslunni er fyrstu 472 blaðsíðunum varið í ýmis rök, þar sem sannanir eru færðar fyrir ýmsum kenningum sem kollvarpa öllu því sem varpað hefur verið fram í gegnum tíðina um hið fræga málverk. Á blaðsíðu 473 sem greinlega er lokasíða skýrslunar stendur eftirfarandi fullyrðing; “…og þarf því ekki nema að beina spegli eftir miðju málverkinu til að sjá…” og með þessum orðum hefur dr. Þórarinn Bergberg tekið sér hlé frá skrifum sínum, því að í eftirfarandi dagbókabroti sem hann skyldi eftir sig og varð hið síðasta sem hann lét á blað áður en hann lést, má lesa eftirfarandi færslu: “Jæja, nú ætla ég að bregða mér aðeins á Hótel Ísland og kem svo endurnærður heim í kvöld til að klára skýrsluna. Það held ég að ég eigi eftir að umbylta allri listasögunni í heiminum þegar þetta verður komið fram.” Því miður lést dr. Þórarinn Bergberg af slysförum þessa örlagaríku nótt og mun því leyndardómur Monu Lisu geymast enn um ókomna tíð. Minningagrein um dr. Þórarinn má lesa í málgagni Jubbblasamtakanna, 1. tbl., 2. árg., jan. 1996.

Afmælis & merkisatburðir 17. janúar 2006

2006-01-17T12:58:00.000Z

Ingólfur Guðbrandsson ferðamálafrömuður er 42 ára í dag. Ingólfur er einna kunnastur fyrir áhuga sinn á kórsöng og stofnaði m.a. fílaharmoníuna 1937 og kór ferðaskrifstofunnar Útferðar 1946. Ingólfur á fjóra fiðluleikara með fimm konum.

Afmæli & merkisatburðir: 12. janúar 2006

2006-01-12T22:32:00.000Z

Angus McBridge, sem býr í Edinborg fæddist þennan dag fyrir þrjátíu og níu árum en hann er kunnastur fyrir safn sitt af veðhlaupaverðlaunapeningum en engan þeirra hefur hann reyndar unnið sjálfur, enda ekki veðhlaupahestur. McBridge er tvígiftur og á tvö börn með fjórum konum.

Fundargerð aðalfundar Jubbblasamtakanna 2006

2006-01-12T22:24:00.000Z

Aðalfundur Jubbblasamatakanna – 12. janúar 2006, haldinn að Hraunbæ 23.

1. Forseti setti fundinn, ritari stakk upp á forseta sem fundarstjóra.

2. Fundarritari las upp fundargerð síðasta fundar, tveir þriðju fundarins vildu láta bóka athugasemd þess efnis að fundargerðir væru skrifaðar inn í fundagerðarbók.
Í framhaldinu spunnust umræður um Gústa Sæm og tölvunotkun hans.

3. Ársreikningar lagðir fram, forseti spurði hvort endurskoðandi hefði farið yfir reikningana en gjaldkeri bendir á að félagasamtök séu undanþegin slíkri endurskoðun. Umræður um árgjaldið spunnust í framhaldið. Ársreikningar samþykktir.

4. Dregið í stjórn: Helgi er framkvæmdastjóri fjármálasviðs og reikningshalds
Elís er forseti, forstöðumaður upplýsinga og framkvæmdasviðs
Garðar er aðalritari

5. Breytingar á lögum samtakanna. Engar breytingar lágu fyrir fundinum.

6. Umræður um íþróttamót Jubbblasamtakanna. Undirbúningi verður áfram haldið.

7. Heimasíða samtakanna rædd, ákveðið að reyna að skrifa reglulega á síðuna.

8. Önnur mál:
a) Elís talaði um að samtökin væru hálf óvirk og voru menn sammála um að reyna að koma á fót einhverjum menningaratburðum og/eða öðrum viðlíka atburðum. Ákveðið að halda árshátíð einhvern tímann á næstunni og jafnvel að tengja það styttuskoðunarferð og fuglaskoðunarferð.
b) Helgi stakk upp á að samtökin fordæmdu blaðaskrif DV um meinta kynferðisafbrotamenn. Tillögunni hafnað.
c) Helgi las upp bréf til samtakanna þess efnis að þrír menn, Elvar Rúnar Ingimundarson, Ástráður Ingimundarson og Kristbjörn Ingimundarson, vildu ganga í samtökin. Ákveðið var að vísa málinu til aðalfundar 2025.

Fundargerð lesin og samþykkt,
Helgi Jónsson (sign), Garðar Jónsson (sign), Elís Anton Sigurðsson (sign)

Fréttir: Of langt gengið

2005-07-01T15:48:00.000Z

Lítið hefur borið á skrifum á þessari síðu að undanförnu. Ástæðan er að Æðstaráð Jubbblasamtakanna hefur staðið í ströngu við að skipuleggja góðgerðargöngu tveggja manna með slasaðan sjómann í kringum landið, í því skyni að vekja athygli á aðbúnaði kvenna. Mennirnir tveir sem báðir eru lamaðir fyrir neðan mitti munu bera á milli sín sjómann sem slasaðist á höfði um borð í eistneskum togara suður af landinu en áætlað er að gangan taki sex til átta ár. Átakið hefur fengið nafnið Gengið of langt og er Jóhannes Páll páfi II verndari þess.

Heimsthing Jubbblasamtakanna i Budapest

2005-06-10T16:34:00.000Z

Aedstarad Jubbblasamtakanna er nu statt i Budapest, hofudborg menningar og lista i mid-Evropu i theim tilgangi ad hefja vidraedur vid tharlend stjornvold um staekkun samtakanna til austurs. Boris Karskenkow ritari ritara adstodarritara fulltrua fulltrua forsetaskrifstofu Ungverjalands hefur tekid jakvaett i erindi samtakanna og eru forseti og ritari einmitt thessa stundina vid samningabordid med adstodamanni hans. Ekki er ad efa ad vidraedur thessar muni styrkja menningartengsl rikjanna.

Barattukvedjur, f.h. JBS
Elis Anton

Fréttir: Heimsþing Jubbblasamtakanna

2005-06-03T20:22:00.000Z

Æðstaráð Jubbblasamtakanna situr, um þessar mundir, heimsþing samtakanna sem fram fer í Búdapest í Ungverjalandi. Þar fara væntanlega fram viðræður við þarlend stjórnvöld um stækkun samtakanna til austurs og er ekki að efa að ef þær hugmyndir ná fram að ganga, munu þær vissulega valda straumhvörfum í starfsemi samtakanna um langt skeið. Við munum greina frá niðurstöðum fundarhaldanna um leið og þær berast

Fréttir: Bilun í heimasíðu

2005-06-03T20:09:00.000Z

Glöggir lesendur heimasíðu Jubbblasamtakanna hafa eflaust orðið varir við afar takmarkaða uppfærslu á efni hennar, að undanförnu, en orsök þess má rekja til bilunar á Windows uppfærslu-stýrikerfi Hi-multi-user perating system netþjóns samtakanna í norðanverðri Evrópu. Við vonumst til að komist hafi verið fyrir bilunina þannig að notendur heimasíðunnar hljóti hvorki neinn skaða af hennar sökum, né röskunar af neinu tagi.

Plötudómur: Gylfi og Gerður - Fullur máni (Gylfi Ægisson, 2001)

2005-05-14T11:06:00.000Z

e. dr. Boga Loga Bogason

Gylfi Ægisson er öllum vel kunnur. Hann hefur leikið og sungið inn á fjölda hljómplatna á síðastliðnum 30 árum en hefur sjálfsagt aldrei verið betri en einmitt núna um þessar mundir. Það er sennilega ekki síst að þakka unnustu hans, Gerði Gunnarsdóttur (sem hann er reyndar skilinn við núna), þeim vinsældum en hún hefur verið hans stoð og stytta í tónlistasköpun sinni undanfarin misseri.
Fullur máni er tíu laga hljómdiskur með þeim skötuhjúum, sem kom út árið 2001 og skartar, við fyrstu hlustun, fjölda smella og má með sanni segja að það sé ekki eitt slakt lag á disknum. Við frekari hlustun staðfestist eingöngu fyrrnefnd orð og festir þau í sessi.
Platan byrjar á hinu fallega “Fullur máni”, sem er grípandi slagari (a-f-e-f-a) undir áhrifum amerísks Washingtons-kántrýs en einnig má greina undir klassíska, finnska, nútíma-alþýðubarrokkstefnu, sérstaklega í viðlagi. Sama má segja um “Frá því fyrst ég sá þig” og “Til þín”, þar sem ásláttasamhljómarnir mynda alls staðar frekar hátt hlutfall í inntakti (2/5-b-f-e-h) en eru samt ekki endilega til baga. Hefði þó verið hægt að lagfæra það í innbyrðis hljómjöfnunartaktinum. Lagið “Gróa á leiti” (f-c-g-d-p) og “Í faðmi þér” (b-a-r-a-b-b-c) falla hins vegar ekki í þá gryfju. Stílvitundarfræðin myndi eðlilega kalla á asíska brass-sónötu, í fyrra laginu en Gylfi ákveður að vera þar frekar fylgjandi nútímastefnu í þýskri blökkumannatónlist. “Akureyrartogararnir” (a-d-d-a-á-b-a-l-a) er falleg þjóðlaga-ballaða í blús-stíl og “Fæðing” (c-c-c-d-g-VII-b) er rockabilly-slagari með greinilegum áhrifum frá hollenskri sembaltónlist frá miðöldum, þar sem ákveðin taktvillustefnumótun á sér greinilega djúpar rætur, sérstaklega í byrjun millikafla. Í laginu “Ég skotin er þér í” (e-f-e-g-g-a-l-a) bregður við allt annan tón. Þetta er róleg ballaða með gullfallegu ástarljóði (sömdu til Gerðar) sem snertir hvern þann sem á hlýðir. Það er í angurværum sígaunatakti (greinilega suður-márítískum), eingöngu spilað á bassa, óbó og kotru en hefði hugsanlega getað orðið fullkomið hefði það verið haft hálfri sjöund neðar.
Ekki hefur enn verið minnst á söng þeirra hjúa á plötunni en í heildina er hann afskaplega vel heppnaður. Gylfi hefur áberandi djúpan (eilítið titrandi í c og f) bariton-róm sem sómir sér einstaklega vel með skærum bassa-falsettum Gerðar. Þannig koma þau einkar vel frá söng sínum sem fellur frábærlega vel að fallegri lagasmíð og hnyttnum ljóðagerðum Gylfa.

Úrskurður: Einstaklega vel heppnaður gripur, sem á erindi á hvert heimili landsmanna. Hiklaust 9 stjörnur af 10.

Afmæli & merkisatburðir: 14. maí 2005

2005-05-14T09:16:00.000Z

Á þessum degi, árið 1795, var frumfluttur ballettinn frægi “Sódavatnið”, eftir Wrangler, í konunglega listballetháskólastofnuninni í Vín, í Austurríki. Komið hefur til tals að Jubbblasamtökin muni hafa veg og vanda að uppsetningu verksins, hér á landi, jafnvel strax næsta vetur.

Afmæli & merkisatburðir: 13. maí 2005

2005-05-13T07:26:00.000Z

Kínverski dverg-listamaðurinn Las In Ýta hefði orðið 97 ára, í dag, hefði hann átt þess kost að tóra áfram í þessu blessaða jarðlífi. Hann lést árið 1987 eftir langvarandi hjartastöðvun nokkrum árum áður, við lestur.

Afmæli & merkisatburðir: 12. maí 2005

2005-05-12T07:25:00.000Z

Hlöðver Runólfsson, stjórnandi “Samkórs Kálfshamarsvíkur” er sextugur í dag. Auk kórstjórnunar og undirleiks fyrir kirkjukór héraðsins, hefur Hlöðver einnig annast básúnukennslu tónlistaskólans, séð um tónmenntakennslu í barnaskólanum auk þess sem hann leikur bæði á trommur og trompet í lúðrasveitinni.

Afmæli & merkisatburðir: 11. maí 2005

2005-05-11T07:24:00.000Z

Á þessum degi fæddist sænski þjóðlagasöngvarinn Jossi Strömdal árið 1941. Hann er helst þekktur fyrir 112 versa “Bellman” ljóða-bálkinn sinn, sem hann frumflutti á frægum þjóðlaga-konsert í Örnsköldsvík haustið 1972. Jossi dó árið 1977 úr leiðindum.

Afmæli & merkisatburðir: 10. maí 2005

2005-05-10T07:23:00.000Z

Spænski nóbelsverðlaunahafinn José Juan El Toro fæddist á þessum degi árið 1912. Eftir hann liggja mörg fræg verk en hann hlaut nóbelsverðlaunin í bókmenntum, fyrir bók sína “Cuando se come aqui?”, árið 1962. El Toro lést árið 1918 úr spænsku veikinni.

Afmæli & merkisatburðir: 9. maí 2005

2005-05-09T07:27:00.000Z

Þennan dag árið 1599 fæddist hollenski listmálarinn Jan van Hooblodunch. Hann þótti afar framfarasinnaður á sínum tíma og varð mjög þekktur fyrir kirkju-karöflur sínar. Jan kom til Íslands, sem ferðamaður, árið 1627, með alsírskum kaupmönnum.

Afmæli & merkisatburðir: 8. maí 2005

2005-05-08T09:30:00.000Z

Franska nútímaskáldið Pierre Vicona fæddist þennan dag árið 1237. Hann þótti ansi róttækur á sviði “m’edqicel-lista” og stýrði fyrsta tímariti sögunnar (“le Cafandue”) sem fjallaði eingöngu um efni tengt bókmenntum. Þá var Pierre einnig fyrstur manna til að þýða biblíuna yfir á algebru.

Afmæli & merkisatburðir: 7. maí 2005

2005-05-07T08:23:00.000Z

Listmálarinn Gvendur í Haga hefði orðið 97 ára í dag hefði hann lifað. Hann er þekktastur fyrir Þingvallamyndirnar sínar, sem svo margir vilja (einhverra hluta vegna) eigna nöfnunum Jóhannesi Kjarval (þess sem opnaði Kjarvals-búðakeðjuna) og Jóhannesi Bónus (listmálara).

Afmæli & merkisatburðir: 6. maí 2005

2005-05-06T07:27:00.000Z

Skoski listmálarinn Scott McPenni-pinching var fæddur þennan dag árið 1723. Hann þótti brautryðjandi á ýmsum stigum málaralistarinnar en var kannski helst kunnur fyrir þá sérstöðu að mála báðum megin á strigann. Scott lést árið 1569.

Afmæli & merkisatburðir: 5. maí 2005

2005-05-05T08:05:00.000Z

Færeyski trúbadorinn Rasmus í Stera er fimmtugur í dag. Rasmus hefur verið þekktur í heimalandi sínu til fjölda ára og skipaði til að mynda tríóið “Misnýtsla” með Andrew Sundsvall í Runavík og Súrhild Fróðasen um tíma.

Afmæli & merkisatburðir: 4. maí 2005

2005-05-04T07:28:00.000Z

Kanadíski listfræðingurinn Erwin Wooglehurst fæddist þennan dag árið 1893. Hann var brautryðjandi á sviði nútímalista en var kannski helst kunnastur fyrir það að verða fyrstur manna til að látast úr listastoli.

Afmæli & merkisatburðir: 3. maí 2005

2005-05-03T07:27:00.000Z

Guðbrandur K. Líndal handritafræðingur er fæddur þennan dag árið 1926. Hann er frægastur fyrir kenningar sínar um uppruna íslendingasagnanna og túlkun sína á veruleik þeirra. Valdemar sást síðast í þjóðskjalasal Árnastofnunar árið 1987 og er ekki vitað hvort hann er lífs eða liðinn.

Afmæli & merkisatburðir: 2. maí 2005

2005-05-02T07:27:00.000Z

Argentínska skáldkonan Pabloina de Sosa er 56 ára í dag. Eftir hana liggja mörg skáldverk á pólítísku nótunum, sem hafa farið allmikið fyrir brjóstið á yfirvöldum í heimalandi hennar. Pabloina hefur dvalist í stofufangelsi í heimalandi sínu s.l. 43 ár.

Afmæli & merkisatburðir: 1. maí 2005

2005-05-01T08:39:00.000Z

Enska ljóðskáldið Philip Scott hefði orðið 118 ára í dag hefði hann lifað. Scott var þekktastur fyrir “Kent- ljóðabálkinn” sem kom út árið 1852 en þess má geta að ljóð hans “Skipstap” hefur komið út í íslenskri þýðingu og birtist m.a. í málgagni Jubbblasamtakanna, Alberti, árið 1996.

Lög Jubbblasamtakanna - III. hluti (greinar 6-10)

2005-04-30T09:27:00.000Z

Við höldum áfram að kynna lesendum okkar lög Jubbblasamtakanna. Hér að neðan má sjá greinar 6-10.

6. grein
Jubbblasamtökin eru virðuleg samtök með virðulega meðlimi og eru þeir beðnir að virða það og gæta sæmdar samtakanna. Þeir skulu því haga sér skv. því út á við og gæta að háttsemi í hvívetna, einkum meðal almennings og menntafólks.
7. grein
Allir félagsmenn Jubbblasamtakanna skulu greiða árgjald sem eru kr. 4200, en það samsvarar 350 krónum á mánuði eða u.þ.b. kr. 11.70 á dag, sem gera tæplega 50 aura á klukkustund. Frjáls framlög vera að sjálfsögðu vel þegin.Árgjaldið skal innheimt með gíróseðli, en það hækkar um kr. 500 hálfum mánuði eftir aðalfund. Hafi menn ekki ennþá greitt félagsgjöld þá, er litið á sem þeir hafi sagt sig úr samtökunum. Æðstaráð er þó alltaf undanþegið árgjöldum.
Greiði meðlimur Jubbblasamtakanna árgjald til tíu ára í senn, fær sá hinn sami 2% afslátt.
8. grein
Árgjaldið er óendurkræft hafi meðlimur samtakanna verið gerður brottrækur úr þeim. Hann skal þá ennfremur greiða brottrekstrarskatt sem er 17,1% af árgjaldi.
9. grein
Ekki er unnt að segja sig úr samtökunum.
10. grein
Jubbblasamtökin skuldbinda sig til að fjárfesta í söfnunarbauk undir frjáls framlög fundargesta, sjá um varðveislu hans og viðhald eins og best verður á kosið.

Pistill: Uppákoma í fimmmenningi

2005-04-30T09:20:00.000Z

e. Þröst Emilsson

Fyrir nokkru ritaði ég pistil um baráttu mína fyrir bættum kjörum bridge-spilara sem eiga við fötlun að stríða. Fljótlega fór mér að berast hótanir og alls kyns leiðindi en svo virðist sem ýmsir ófatlaðir lesendur þessarar ágætu vefsíðu séu ekki sáttir við það sem ég hafði fram að færa. T.d. bárust mér bæði líflátshótanir og bréfasprengjur, auk þess sem einhver skrifaði með svörtu blóði á húddið á bíl mínum “rasysti”. Vegna þessa vil ég taka skýrt fram að það var ekki ætlan mín að særa einn eða neinn með skrifum mínum og bið ég alla blámenn afsökunar hafi ég gert það. En að öðru.
Ég lenti í skemmtilegri aðstöðu sem bridge-spilari í síðustu viku. Þar sem við sátum fimm við borðið (við spilum iðulega fimmmenning) sá ég að fjórir þristar og slamgengill (tveir gosar og tía) lágu í forhöndinni og þar með þyrfti ég ekki að spila spilið á enda heldur losa mig við afganginn og “sletta”. En sagan er ekki öll, vinstri spilarinn mér á hægri hönd, kíkkaði mig og leysti síðan út með FX4 hægri og fjögur grönd í vestur, þannig að upp kom sú aðstaða sem á ekki að geta komið upp, að við vorum slömm og gátum ekki steytt til vinstri, eins og það er kallað á bridge-máli, enda báðir patt. Fyrir vikið urðum við að henda spilunum og kaupa ný. Þetta er fremur sjaldgæft í spili nú til dags en ég man eftir að þetta kom upp í spaðaútspili í einmenningi í Brent fyrir nokkrum árum, þar þurfti reyndar að aflífa kónginn. Þetta sýnir að allt getur gerst í bridge-i.

Afmæli & merkisatburðir: 30. apríl 2005

2005-04-30T09:19:00.000Z

Þennan dag árið 1946 fæddist gríska kántrý-söngkonan Gloria Pokpalipkopkis. Hún varð heimsfræg árið 1968 er hún sigraði í söngvakeppni evrópska sjónvarpsstöðva með laginu “Yes, I luv you”, sem Þuríður Sigurðardóttir söng síðan seinna undir heitinu, “Ó, ástin mín blíð”.

Afmæli & merkisatburðir: 29. apríl 2005

2005-04-29T07:42:00.000Z

Riipiittii Lååkkååhakkiinen, finnska ljóðskáldið fræga, hefði orðið 117 ára í dag hefði hann lifað. Riipiittii var kunnastur fyrir ljóðabókina “Tarkenettu haku” sem hann fékk bókmenntaverðlaun norðurlandaráðs fyrir árið 1973. Riipiittii lést í útrýmingabúðum nasista árið 1949.

Afmæli & merkisatburðir: 28. apríl 2005

2005-04-29T07:39:00.000Z

Bandaríski gítarleikarinn Steve Wellwood er fæddur þennan dag árið 1949. Hann spilaði m.a. með hljómsveitunum; AD/CD og Mairon Aden, auk þess sem hann lék með Pink Floyd og félögum um skeið.

Plötudómur: Bruno Martino & hljómsveit - Sanremo '59 (HMV, Ítalía 1960)

2005-04-27T08:59:00.000Z

e. dr. Boga Loga Bogason

Að þessu sinni ætla ég að dæma hljómplötu ítalska stórsöngvarans Bruno Martino, sem naut gríðarlegra vinsælda hér á árum áður. Það eru eflaust fáir sem ekki muna eftir þessum fræga listamanni, sem söng sig inni í hug og hjörtu landsmanna allra, er hann kom hingað til lands á vormánuðum árið 1963 með hljómsveit sinni og spilaði á þrennum hljómleikum í Gamla bíói.
Hljómplata sú sem hér verður fjallað um kom hins vegar út þremur árum áður og hlaut mikið lof gagnrýnenda um heim allan á sínum tíma. Það er ekki síst að þakka fyrsta lagi plötunnar, “Piove” sem er eftir hinn þekkta lagahöfund Modugne. Lagið byrjar í c-moll og er byggt upp með gamalli, ítalskri brasstækni sem nýtur sín sérstaklega vel með hljómfagurri bragháttastíltækninni. Hljómagangurinn er mjög dæmigerður (e-a-e-d-c-d-e-a-2/8) þar sem inntaktur berst frekar seint (IV-c-c-c-c-c-c-c) og því virkar millikaflinn fremur flatur og annar endataktur hljómar því sem næst alveg sveiflulaus.
Í öðru lagi plötunnar (Li´Per Li´) er annað hins vegar uppi á teningnum. Þar nær bandið sér engan veginn á strik og því er ekki síst að kenna um slökum langhörpuleik. Lagið er í alsírsku þríundarhljómfalli sem fellur vel að rámri alt-sópranrödd Brunos en hann nær engan veginn að halda uppi laginu einn. Það er jafnvel spurning hvort ekki hefði hentað betur að byrja lagið í a (a-f-g-d-a) en hækka síðan um hálfa áttund við byrjun annars verss.
“Sempre con te” er þriðja lag plötunnar. Í sjálfu sér ágætt lag (eftir Murolo) sem endurspeglar norrænan þjóðlaga-ryþþma. Í millikaflanum bregður fyrir ansi skemmtilegum prelódíu-stemmum sem lyfta verkinu óneitanlega upp á hærra plan. Lagið byrjar í f-dúr (g-a-b-b), lækkar síðan um hálfa níund en endar með einkennilegum ásláttastílbrag (g-e-f-d-e-VII-L) sem að öllum líkindum mætti skilgreina sem þrefalt bít (það er reyndar auðvelt að staðfesta með einföldum bít-aflsmælingum).
Fjórða lagið, “Un Bacio Sulla Bocca”, er öllu lakara. Það er byggt upp með kínverskum alþýðusónötum en það er einmitt tónlist sem almennt er talin eiga við “ryþþmastíflu-vandamál” að glíma. Lagið byrjar sem e-sjöund (h-e-g-b-c-) og er með endarím sem fellur ekkert sérstaklega vel að þeirri hljómbreytingahrynjandi sem einkennir lagið. Þannig eru til dæmis mjög áberandi hnökrar í 12. og 13. sveifluriði a-tóns (það byrjar; b-c-d-a-f-d) munnhörpu sólós en það hefðu hljómhvarfafræðingar nútímans auðveldlega getað lagað með taktvindu.

Úrskurður: Kannski svolítið hroðvirkislega unnin plata á köflum, en söngur Bruno Martino lyftir henni þó upp á hærra plan. 7 stjörnur af 10.

Afmæli & merkisatburðir: 27. apríl 2005

2005-04-27T07:31:00.000Z

Afmæli & merkisatburðir: 26. apríl 2005

2005-04-26T07:29:00.000Z

Norska nóbelsskáldið Jan Storgaard var fæddur þennan dag árið 1883. Hann skrifaði margar kunnar skáldsögur en þekktastur var hann sjálfsagt fyrir bókina “Et Træ í lunden” sem hann fékk einmitt nóbelsverðlaunin fyrir árið 1947. Jan lést úr norsku árið 1991.

Afmæli & merkisatburðir: 25. apríl 2005

2005-04-25T08:01:00.000Z

Ítalski tenórinn Andriano Pepperoni fagnar 64ra ára afmæli sínu í dag. Hann er þekktastur fyrir að hafa sungið trió með stór-tenórunum frægu; Pavarotti, Domingo og Carreras en auk þess hefur hann sungið í óperum víða um heim.

Lög Jubbblasamtakanna - II. hluti (greinar 1-5)

2005-04-24T21:24:00.000Z

Lög og reglur samtakanna verða birtar hér á vefsíðunni á næstu vikum. Hér er annar hluti þeirra, greinar 1 - 5.

1. grein
Jubbblasamtökin eru samtök manna sem hafa það að markmiði að skemmta sjálfum sér, auk þess að halda uppi menningarlegri starfsemi. Jubbblasamtökin eru m.ö.o. menningarsamtök og ber að starfa sem slík.
2. grein
Heimilisfang Jubbblasamtakanna er að XXXXXXXXXX efri hæð, 104 Reykjavík en þar eru ráðstefnu- og samkomusalir samtakanna ennfremur til húsa.
3. grein
Jubbblasamtökin eru stéttaskipt samtök og eiga félagsmenn að virða það í einu og öllu.
4. grein
Fundir skulu haldnir minnst einu sinni í mánuði yfir vetrartímann (september – apríl) sé þess nokkur kostur, en frjálst er að leggja niður starfsemina að nokkru eða öllu leyti á sumrin. Andi samtakanna skal þó alltaf ráða ríkjum í hugarheimi félagsmanna, svo framarlega sem viðkomandi teljist heill heilsu. Boðað skal til aukafundar reynist ástæða til. Æðstaráð getur eitt ákveðið hvort aukafundur sé haldinn en aðrir geta farið fram á það skrifleiðis, óbreyttir félagsmenn (þeir sem ekki eru í nefndum) þurfa þó að grátbiðja um fund og leysa Æðstaráðið út með gjöfum vilji þeir fara fram á fund. Æðstaráðið hefur þó alltaf síðasta orðið.
5. grein
Aðalfundur samtakanna skal halda í janúar ár hvert og eru þá reikningar samtakanna lagðir fram, auk ársskýrslu. Öllum félagsmönnum er skylt að sækja aðalfund, að öðrum kosti skal sá hinn sami greiða aðalfundarskatt, sem reiknast 15% af árgjaldi samtakanna.

Afmæli & merkisatburðir: 24. apríl 2005

2005-04-24T10:24:00.000Z

Austurríska tónskáldið Wholfgang Zweitsh fæddist þennan dag árið 1673. Hann gerð m.a. Sígauna-sónöturnar frægu og óperuna “Kastaladraugurinn”, auk þess sem hann samdi fjöldann allan af sinfóníum. Zweitsh lést árið 1891, í hárri elli.

Pistill: Ljóðsköp & yrk II

2005-04-23T13:55:00.000Z

e. sr. Tyrfing T. Tyrfingsson

Eins og svo oft á vorin var ég uppi á lofti að grúska í rykföllnum bókum í gær. Fann ég þar í stílabók sem er líklega frá því um 1920, frumdrög að ljóði sem heitir Únglíngurinn í skóginum og er eftir einhvern Halldór Guðjónsson. Hér að neðan eru nokkrar línur úr þessu óttarlegu hnoði og blöskrar mér að einhverjum skuli detta þvílíka vitleysu í hug;

Eia!
Eia perlur! Eia gimsteinar!
Eia leikur
leikur í sólskini
útí skógi!
Hver fór í skóginn,
kysti animónur og hló, ...

Þegar ég hafði lesið í smástund fékk ég nóg og tók kassann sem bókin var í og henti ásamt einhverjum teikningum af einhverjum fornaldarvélum, ásamt málverki af brú yfir tjörn, merktum Leonardo og Claude M. Mér er algjörlega fyrirmunað að skilja hvers vegna fólk hendir ekki strax svona hnoði og myndarusli sem er engum til gagns eða gamans. Og ekki var allt búið. Neðst í kassanum voru einhver föt, líkklæði að mér sýndist og merkt MM. Auðvitað fór ég með allt beint í Sorpu.
Góðar stundir

Afmæli & merkisatburðir: 23. apríl 2005

2005-04-23T09:36:00.000Z

Zoran Jübblevic fæddist þennan dag árið 1837. Hann var kunnur brautryðjandi á sviði Kurial-stefnu Data-ismans og meðal þekktustu verka hans má nefna; Jómfrúina (1851), Nafnlaust (1985) og Ávextir (1288). Jübblevic lést úr lungnabólgu árið 1772.

Afmæli & merkisatburðir: 22. apríl 2005

2005-04-22T08:09:00.000Z

Stephan Kreizhzh, myndhöggvarinn frægi, hefði orðið 92 ára í dag hefði hann lifað. Stephan var helst þekktur fyrir hin frægu verk sín, Berlínar-brjóstmyndirnar sem hann gerði á sjötta áratug síðustu aldar og fræga höggmynd af plánetunni Venus. Stephan lést árið 1982.

Pistill: Af Islendinga i Manitoba

2005-04-21T21:13:00.000Z

e. Charlie Thor Stephensen

Eins og flestir munu kunnugir vera fluttust allmargir Islendingar til Westurheims a sidari hluti nitjandu aldar. Islendingabyggd i smabaenum Port Nelson vid Hudson bay hefir blomgast allt fra theim tima og hafa ibuar thess stads lengi haldid vid tungu sinni og uppruna med arlegri hatid tengdri atthogum sinum. Til daemis hefur oflugt fjelag verid starfandi sem ser um utgafu magasins með allskonar cultureefni svosem ljod og greinar um landi i norðri. Thvi er ekki ad neita ad Kanadaibuar lita oss tortrygg augum oft a tidum er ver Islendingar holdum thorrablot en einmitt a sidasti bloti helt Gudrun Sue Williams erindi um helgisidi forfedra okkar en fadir afa hennar fluttist til westur um hof sem young telpa.
Ver hofum lika haldid kveðskaparhefdin a loft og var haldin samkeppni um best aldamotaljodid arid 2000 en su keppni sigradi John Gudmundsson fra Gimli. Ljod hans hljomar svo:
Oss fodurlands obyggd med frosti og vindum,
hun feykir i hvivetna snænum af tindum,
thar logar i brjostinu lif vort med alftum
og landid thad skelfur af eldum og skjalftum.

Thott vesold oss reki til westurs um lendur
tha viljum vid aldrei, thu isa lands strendur,
ther gleyma en geigur oss umlykur vida
er getum ver ekki klædst fodurland sida.

Og megni ei bornin ad matast fyr trega
thvi barlomur theirra hann eykst storkostlega
tha segjum vid sogun’ af langommu ungri
sem saladist thriggj’ ara ur vosbud og hungri.

John sigradi thess keppni med yfirburdi en alls barst nefnd hennar niu ljod, thar af sex eftir John en thrju eftir sonur hans, Tom Gudmundsson.
Kvedjur til Fron.

Fréttir: Merkismenn og -atburðir

2005-04-21T21:11:00.000Z

Þar sem vefsíða Jubbblasamtakanna á að heita tengd menningu og listum munu eftirleiðis birtast greinar um ýmsa listamenn lífs og liðna, á afmælisdögum þeirra. Er þetta gert fólki bæði til fróðleiks og skemmtunar, en viðkomandi fyrst og fremst til heiðurs. Ennfremur munu merkisatburðir vera rifjaðir upp með sama hætti.

Pistill: Ljóðsköp og yrk I

2005-04-19T07:49:00.000Z

e. sr. Tyrfing T. Tyrfingsson

Í þessum kvæðabálki mínum hér á vefsíðu Jubbblasamtakanna mun ég leitast við að sýna lesendum hve íslensk tunga getur verið margbreytileg og um leið krefjandi fyrir þá sem hana nota. Margur kann að koma fyrir sig orði og verður aldrei svarafátt, kasta jafnvel fram stakhendingum eða fimmskeytlum við hvert tækifæri. Kollegi minn, séra Hilmar á Stekkum þótti maður orðheppinn og eitt sinn hitti hann sveitunga sinn sem þótti leiðinlegur með víni en var þó enn leiðinlegri edrú þannig að oft héldu menn að honum víni. Stóð þannig á hjá honum í þetta skiptið að hann var nær dauða en lífi sakir ölvunar og kastaði hann fram framparti fyrir séra Hilmar sem hljóðaði svo;
Ölvaður og ær ég er
einkum þó að neðan

Séra Hilmar svaraði þá að bragði;
Blindfullur - sem betur fer
og blaðrar ei um leið.
- eða hvort það var “á meðan” þarna í lokin, ég man það ekki alveg. En séra Hilmar þótti yfirleitt mjög skemmtilegur í lifanda lífi, geysilega glettinn náungi.
Góðar stundir.

Lög Jubbblasamtakanna - I. hluti (markmið)

2005-04-19T07:46:00.000Z

Eins og greint var frá fyrir stuttu er ætlunin að setja lög Jubbblasamtakanna á vefsíðuna og hér kemur fyrsti hlutinn. Þau verða síðan sett smám saman inn en vegna umfangs þeirra er sá háttur hafður á.

Markmið Jubbblasamtakanna
Markmið samtakanna skulu vera þau að efla og fæða af sér alls kyns rugl og vitleysu á menningarlegum nótum, s.s. á sviði skáldskapar, ljóðlistar og annarra fíflaláta. Hvers kyns samkomur á vegum samtakanna skulu því vera yfirþyrmandi á allan hátt. Ennfremur skal meginmarkmið samtakanna vera að hneyksla innanfélagsmenn með einhverjum hætti og skulu því allar opinberar samkomur vera lokaðar almenningi. Hver félagsmaður sem brýtur gegn markmiðum þessum og vinnur markvisst að niðurrifun samtakanna og um leið að almennri menningarhnignun, skal sæta ýmiss konar gagnrýni frá öðrum félagsmönnum samtakanna í formi ádeilukveðskaps og níðs.
Jubbblasamtökin skulu auk þess standa fyrir mikilli útgáfustarfsemi innan samtakanna á efni því sem meðlimir þeirra kunna að semja. Að auki skulu samtökin halda að félagsmönnum sínum mikilli menningarlegri starfsemi og hampa eigin menningarlegum listaverkum, hvort sem það er út á við eður ei.
Allt efni sem birtist í munnlegu og/eða skriflegu formi á samkomum eða á vegum Jubbblasamtakanna skal vera frumsamið, auk ess sem allt efni skal vera flutt munnlega á samkomum þeirra. Ennfremur skal allt efni póstsent til Jubbblasamtakanna að XXXXXXXXXXXXXX XX Reykjavík.

Fréttir: Jubbblasamtökin fá póstfang

2005-04-19T07:45:00.000Z

Jubbblasamtökin hafa nú fengið póstfang. Slóðin er jubbblasamtokin@hotmail.com og geta lesendur sett sig í samband við samtökin ef þeir vilja koma einhverju á framfæri við Æðstaráð. Ennfremur geta verðandi pistlahöfundar komist í samband við samtökin hafi þeir áhuga á skrifum fyrir vefsíðuna. Þrátt fyrir aragrúa pistlahöfunda sem nú þegar hafa lýst yfir áhuga á pistlaskrifum er enn unnt að bæta við nokkrum.

Fréttir: Lög Jubbblasamtakanna

2005-04-17T21:44:00.000Z

Eins og flestum er kunnugt eiga Jubbblasamtökin sér ítarleg lög og reglugerðir sem ná yfir alla starfsemi þess. Næstu vikur verða þau kynnt almenningi hér á vefsíðunni en þar sem umfang þeirra er mikið er óhjákvæmilegt að skipta þeim niður, nokkrar greinar í senn.
Er ekki að efa að lesendur muni lesa þessi lög og reglugerðir af miklum áhuga, einkum og sérílagi lögfróðir einstaklingar enda eiga þau sér vart hliðstæðu í sambærilegum félagssköpum.

Fréttir: Enn fleiri pistlahöfundar

2005-04-17T21:37:00.000Z

Á næstunni mun hinn vesturíslensk ættaði Charlie Thor Stephensen hefja röð reglulegra pistla frá Manitoba í Kanada en hann er barnabarnabarnabarn Stephans G. Stephensen skálds sem fluttist vestur um haf ásamt þúsundum annarra Íslendinga á nítjándu öld. Charlie Thor er í forsvari fyrir öflugt Íslendingafélag sem starfrækt er á Íslendingaslóðum en félag þetta hefur til dagsins í dag verið afar virkt í menningarstarfseminni vestra. Charlie Thor er fjörtíu og níu ára gamall rafeindavirki og talar reiprennandi íslensku.

Fréttir: Fjórði pistlahöfundurinn bætist í hópinn

2005-04-16T11:31:00.000Z

Pistlahöfundar keppa nú um hylli Æðstaráðs Jubbblasamtakanna en nú bætist sá fjórði í hópinn, Tyrfingur Tyrfingur Tyrfingsson en hann er eins og þeir Þröstur Emilsson og Guðni Hannesson, fyrrverandi pistlahöfundur í Rangæingaqóstinum sem kom út á árunum 1990-92. Sr. Tyrfingur er mikill áhugamaður um kveðskap en auk þess mun hann rita um kirkjunnar mál og önnur trúarbrögð.

Tyrfingur fæddist að Laugum í Vatnsfirði 1912 eða 13 (heimildum ber ekki saman) og er því kominn á aldur eins og sagt er. Tyrfingur hlaut strangt uppeldi en faðir hans var prestur vestra. Kom að því að fjölskyldan fluttist suður í Rangárþing, í Landeyjarnar en faðir hans hafði þá hlotið prestsembætti að Krossi. Þar undi Tyrfingur sér vel innan um beljur og búfénað en hugur hans lá í guðfræðina þar sem hann útskrifaðist 1936. Hann fékk strax starf við þýsku ræðismannaskrifstofuna í Reykjavík, aðallega til að messa yfir þýskum skipbrotsmönnum sem flykktust til landsins á þessum árum. Það var því ungur prestur sem blandaðist inn í styrjaldarátök fjórum árum síðar og reyndar var hann fluttur sem stríðsfangi ásamt öðrum starfsmönnum ræðismannaskrifstofunnar en kom heim að loknu stríði um miðjan fimmta áratuginn. Þá var faðir hans orðinn biskup en hafði neitað að gegna störfum við embættið í Reykjavík þannig að biskupsstóllinn var um tíma í Landeyjunum (til ársins 1968). Að föður sínum látnum (1968) tók Tyrfingur við embætti dómprófasts í heimasókn sinni en í millitíðinni hafði hann leyst af víðs vegar um land. Síðan 1988 hefur hann verið formaður prestafélagsins og verið fremstur í baráttunni í réttindamálum djákna en þeir hafa eins og kunnugt er, nánast verið lagðir í einelti síðan embættið á Myrká var lagt niður.

Þótt Tyrfingur sé kominn á tíræðisaldur er hann vel ern og tók t.d. þátt í maraþoni eldri borgara í Massachusetts í fyrrasumar þar sem hann lenti í áttunda sæti í flokki níutíu ára og eldri.

Fréttir: Tilkynning til meðlima

2005-04-15T21:17:00.000Z

Ljósmyndir af Æðstaráði Jubbblasamtakanna, sem teknar voru á síðasta aðalfundi, eru nú komnar úr framköllun og því tilbúnar til afhendingar. Meðlimir samtakanna geta nálgast eintak hjá Garðari Jónssyni forseta.

Plötudómur: Nina & Frederik - Vol. 2 (Metronome records, Danmark 1966)

2005-04-15T21:00:00.000Z

eftir dr. Boga Loga Bogason

Það má með sanni segja að ég ráðist ekki á garðinn þar sem hann er lægstur, með þessari fyrstu hljómplötugagnrýni minni. Danska þjóðlagaparið Nina & Frederik hafa vissulega átt hug minn og hjarta frá þeirri stundu er ég heyrði þeirra fyrst getið og því skildu margir sjálfsagt áætla að ekki bæri ég alveg lausan hlut frá því borði.
Og það er nú einmitt raunin. Strax á fyrsta laginu, “Skal vi tröpke som hund” eftir Jan Gegelund, fær hin íðilfagra rödd Ninu svo sannarlega að njóta sín. Og ekki spillir fyrir þegar Frederik kemur inní viðlagið (að vísu einum þriðja úr sjöund of snemma) með sinni kristaltæru baritonrödd. Lagið telst vera calypso (þó með nettu jazz-ívafi) en flestir forhljómar (g-b-c-a-u / IIV- b) gætu auðveldlega villt fyrir óglöggum með þessu sveiflustílbroti. Óvænt hljómbreyting (h-e-c-f-bVII) seint í selló-sólóinu (gæti líka hafa verið rispa á plötunni) kemur sjálfsagt mörgum í opna skjöldu en fáir vita að slíkt umrót telst vera mótað af aldargamalli pólýfónískri hefð.
Svipað er uppi á teningnum í þriðja lagi plötunnar, “Den smukkte forhud” eftir Hans Flammenberg, sem reyndar er meira einkennandi fyrir mjög hljómadjúpan áslátt. Það lag syngur Frederik einmitt í svolítið einkennilegri bassakenndri fallsettu, sem þó nýtur sín alveg einstaklega vel með þýðri millibakrödd Ninu. Lagið hefur einkar hráslagarlega áferð, jafnvel einmanalega (minnir eilítið á “the world behind my house” með Dennis Stock) en hljómagangurinn (e-a-e-b-ii-a-e-/IIV-b-IX) með þríunda-bragháttastuðlum gera lagið að gullfallegri ballöðu. Ég hefði þó persónulega ekki haft mandolin-kaflann svona hraðann.
Annað lagið, “Med dine hjarte”, er af allt öðrum meiði. Þar togast einmitt á, annars vegar, fágaður isometriskur hrynjandi með klassískri sónötu og hins vegar rockabillýskur innblásinn taktslaki (með bassa og banjó) sem einkennist svolítið af ragtime eða jafnvel kántrýi. Lagið er í fís/dúr (b-b-b-b-d-a-c-b/VI-c) og því fremur grípandi slagari, enda varð það óheyrilega vinsælt á sínum tíma.
Fjórða og síðasta lag plötunnar er af allt öðru sauðahúsi en hin þrjú. Það er gamalt franskt þjóðlag, “Maladie d’Amour” (sem sjálfsagt margir komnir á efri ár kannast við) og er í tregablandinni Týróla-útsetningu hjá þeim skötuhjúum. Lagið spilar Frederik á 11 strengja portúgalskan Guandou-gítar, sem hann, því miður, hefur ekki náð nógu góðum tökum á ennþá. Honum til aðstoðar við undirspilið eru þeir Jürgen Sparzl (orgel), Ivan Mladenovic (knéfiðla) og Bill Boston (harmonikka). Lagið syngja þau saman með ljómandi fallegu hljómariffi (sem er greinilega undir áhrifum Beach Boys) en þau skipta með sér viðlaginu í afar smekklega formuðum grískum stíl, hann í millisópran en hún í bassabaritónískri falsettu.
Ekki er hægt að skilja við án þess að minnast nokkrum orðum á umslag plötunnar, sem er að mínu mati afskaplega smekklegt og vel heppnað. Það er einfalt, rautt í grunninum með látlausri mynd af þessu fallega danska tónlistafólki og algjörlega laust við alla flókna skrautvinnslu, sem allt of oft einkenna plötuumslög nútímans.

Úrskurður: Heilsteypt og fallega unnin plata sem fær hiklaust 9 stjörnur af 10.

Pistill: Beljur og búfénaður I

2005-04-14T17:31:00.000Z

eftir Guðna Hannesson frá Svaðbæli

Á ferð minni um Þýskaland fyrir nokkru rakst ég á skemmtilega nýjung sem ég er ekki í nokkrum vafa um að bændur á Íslandi gætu nýtt sér á ýmsan hátt. Um er að ræða eins konar tæki sem hengt er aftan í dráttarvélar og er notað til að raka saman hey. Tækið er með elementi, knúið af vél dráttarvélarinnar og er mun afkastameira en hrífur sem bændur nota töluvert mikið í dag. Það má segja að nokkur hjól sem snúast í hringi taki lausa heyið með sér og rakar því saman í múga. Ég er ekki í nokkrum vafa að slíkt tæki gæti nýst á margan hátt hér í landbúnaðarhéröðum sunnanlands þótt ég sé reyndar efins um að Norðlendingar séu tilbúnir að takast á við slíkar tækninýjungar.

Hér að ofan má sjá nokkuð nákvæma skýringarmynd sem ég rissaði upp af þessu nýmóðins tæki.

Úr handraðanum: Harmur minn er mikill - Leikdómur um Óperu eftir Elís Anton Sigurðsson

2005-04-14T16:35:00.000Z

Eftir Helga Jónsson

Nafnlaus ópera eftir Elís Anton Sigurðsson um bakara sem reynir að fyrirfara sér en kona slátrarans bjargar honum. Handrit, söngur, leikstjórn, ljós, sviðsetning og búningar; Elís Anton Sigurðsson. Leikendur; Elís Anton Sigurðsson. Flutt á fyrsta fundi Jubbblasamtakanna 29. október 1995.

Ég varð fyrir stuttu þess "vafasama heiðurs" aðnjótandi að vera viðstaddur sýningu öróperu nokkurrar er Elís Anton Sigurðsson hefur sett á fjalirnar. Ópera þessi náði varla tveimur mínútum að lengd og satt best að segja varð ég því bráðfeginn. Söngur Elísar var í stuttu máli mjög slæmur og honum til háborinnar skammar. Það vantar ekki að Elís hefur mikla og sterka sópranrödd, sérstaklega í hlutverki konu slátrarans en þar er alls ekki nóg, raddbeiting var afar slæm og Elís var hreinlega mjög falskur á tímum í hlutverki hennar. Elís lék einnig hlutverk bakarans, sem reyndar hentaði honum mun betur, þó svo eins og fyrr að hann var ekki nálægt laglínunni á stundum.
Búningum var mjög ábótavant hjá Elísi, enda lék hann bæði hlutverk óperunnar. Terlín buxur og skyrta er vafasamur búningur fyrir bakara, og enn síður fyrir konu slátrarans. Engin hljómsveit lék undir í óperunni, enda erfitt að halda uppi hljómsveit fyrir tveggja mínútna óperu, á launum. Það jákvæðasta við sýninguna fannst mér ljósin en afspyrnu lítil birta var á sviðinu, sem er eitt það minnsta sem undirritaður hefur séð. Þegar á heildina er litið var sýningin afar illa heppnuð og ráðlegg ég Elísi að breyta yfir í eitthvað sem hann ræður við. Þess vegna gef ég honum aðeins eina stjörnu af fimm og er harmur minn mikill, svo vitnað sé í eina setninguna með viti í óperunni.

Greinin birtist í Alberti, málgagni Jubbblasamtakanna 1995.

Fréttir: Enn bætast við pistlahöfundar

2005-04-13T18:19:00.000Z

Jubbblasamtökin hafa nýverið komist að samkomulagi við Boga Loga Bogason, doktor í tónheyrn, um hljómplötu- og tónleikagagnrýni hér á vefsíðunni. Einnig mun dr. Bogi Logi rita almenna pistla um ýmsan fróðleik, varðandi hljómlist.

Dr. Bogi Logi Bogason er fæddur á Akureyri sumarið 1951 og gekk tiltölulega snemma á braut listagyðjunnar. Hann hóf sembal- og básúnunám við Tónmenntaskóla Eyjafjarðar aðeins sex ára gamall og lauk 8. stigi námsins vorið 1963. Haustið eftir hlaut hann inngöngu í hinn virta St. Braukhenbauer tónlistaskóla í Vínarborg og útskrifaðist þaðan sem konsertmeistari árið 1967. Þaðan lá leið hans til Ítalíu þar sem hann lauk doktorsnámi í klassískri tónheyrn, frá San Falconara hljómlistaakademíunni í Mílanó, auk þess sem hann stundaði samtímis söngnám við sama skóla.
Árið 1970 fluttist dr. Bogi Logi til Bandaríkjanna þar sem hann starfaði meðal annars, um tíma, sem listfræðilegur ráðunautur rokkhljómsveitarinnar Zed Leppelin auk þess sem hann leysti af hólmi 3ja fiðluleikara, fílharmóníuhljómsveitar Lemmon borgar í suður Dakota um skeið.
Hann fluttist til Íslands snemma árs 1973 og hóf fljótlega störf við Tónsmíðadeild Háskóla Íslands auk þess sem hann lék og starfaði með Sinfóníuhljómsveit Íslands í hjáverkum. Hann stóð fyrir ýmsum vakningum varðandi tónlistanám ungs fólks, sá um hinn geysivinsæla þátt “hljómfegurð barrokksandans” á Ríkisútvarpinu um alllangt skeið, auk þess sem hann ritaði fróðlegar greinar um tónlist í tímarit Félags íslenskra lútuleikara. Um skeið söng hann einnig dúett með Vilhjálmi og Ellý Vilhjálms og stjórnaði fjöldasöng á alþingishátíðinni á Þingvöllum árið 1974.
Sambýlismaður dr. Boga Loga er Maríus Dominiques frá Taílandi og eru þeir barnlausir.
Við bjóðum dr. Boga Loga hjartanlega til starfa.

Pistill: Fatlaðir, rísum upp og stöndum saman!

2005-04-13T16:16:00.000Z

eftir Þröst Emilsson

Réttur íþróttamanna er mikill í miskunnalausu samfélagi þar sem frumskógarlögmálið gildir og hver reynir að gera sinn hlut sem stærstan. Margt hefur þó áunnist í baráttu minnihlutahópa í íþróttum og til að mynda hafa konur nú fengið að keppa í sumum íþróttum þótt auðvitað séu ekki allir á eitt sáttir um það. Blámenn hafa jafnvel fengið keppnisrétt með heilbrigðu fólki og eru meira að segja til dæmi um að slíkt fólk hafi unnið til verðlauna á alþjóðavettvangi, sbr. Taiger Wods golfari.

Fatlaðir njóta stöðugt meiri réttinda og fá nú orðið sérstaka ólympíuleika sem er að sjálfsögðu áfangasigur fyrir þann fjölda er fyllir þann hóp, en sjálfur er ég fatlaður eins og kunnugt er. Hins vegar er ekki á allt kosið í réttindum okkar fatlafóla, þrátt fyrir linnulitla baráttu mína fyrir bættum kjörum í minni grein, bridge-inu, hefur alþjóðlega bridge-sambandið ekki fallist á rök mín og minna um betra aðgengi fatlaðra að bridge-borðinu. Í raun má segja að við þurfum að sitja við sama borð og aðrir. Ég hefi barist fyrir því svo árum skiptir að bridge fatlaðra verði viðurkennd sem sérgrein innan íþróttahreyfingarinnar og að keppt sé sérstaklega í henni á sama hátt og frjálsum íþróttum fatlaðra, semsagt á jafnréttisgrundvelli. Það segir sig sjálft að óréttið er algert, engum myndi detta í hug lengur að láta t.d. hreyfihamlaða etja kappi við alheilbrigða stangarstökkvara eða heilbrigt fólk við blökkufólk í spretthlaupum. Það hlýtur að vera réttur hvers og eins og fá að leiða hesta sína við keppendur af sama meiði. Fatlaðir, rísum upp og stöndum saman gegn þessu órétti.

Fréttir: Fleiri pistlahöfundar

2005-04-12T17:14:00.000Z

Á næstu dögum mun hinn geðþekki Þingeyingur Þröstur Emilsson byrja með reglulega pistla hér á síðunni. Hann er mörgum að góðu kunnur en hann sá m.a. um bridge-þátt í Rángæingaqóstinum fyrir margt löngu, hann hefur aukinheldur staðið framarlega í baráttu fatlaðra fyrir auknum réttindum. Hann er annar pistlahöfundurinn á stuttum tíma sem ákveðið hefur að ganga til liðs við vefsíðu Jubbblasamtakanna.

Þröstur er Húsvíkingur í húð og hár. Hann lauk stúdentsprófi frá Menntaskólanum á Grenivík vorið 1973 en hann var þá aðeins 18 ára. Aldrei varð þó úr að hann færi í framhaldsnám enda átti bridge íþróttin hug hans og hjarta. Snemma fór Þröstur um landið og kenndi þessa göfugu list og kennir sig einkum við Zahif-Kashem skólann í þeim efnum. Þröstur hefur þó aldrei verið í landsliði Íslendinga í íþróttinni enda, eins og hann hefur sjálfur sagt, “fyrir neðan hans virðingu að keppa í hugaríþróttum og lýsir einungis virðingarleysi fyrir huganum”. Sonur Þrösts, Emill Snær hefur einnig snúið sér að brigde-inu en hann er aðeins fjórtán ára gamall en þó í fremstu röð spilara á Húsavík.

Þröstur hóf að rita pistla í Rángæingaqóstinn 1991 en hafði áður séð um brigde-þrautir í Heima er best. Hér á vefsíðunni mun bridge-ið að sjálfsögðu verða fyrirferðamikið en einnig mun Þröstur rita um málefni fatlaðra, sjálfur er hann bundinn við hjólastól eftir bridge-slys fyrir tuttugu árum þar sem hann m.a. mænu- og mjaðmagrindabrotnaði. Ennfremur hefur Þröstur glímt við MDF sjúkdóminn um árabil.

Fréttir: Af verðandi pistlahöfundum

2005-04-12T08:30:00.000Z

Nú hafa náðst samningar við Guðna Hannesson um samningu pistla fyrir vefsíðu Jubbblasamtakanna en hann hefur í gegnum tíðina sérhæft sig í hvers kyns bóndaskap. Guðni er ekki einungis sérfróður um bændastörf heldur er hann einnig mikill áhugamaður um menningarstarfsemi bændastéttarinnar. Við bjóðum Guðna velkominn til starfa.

Guðni fæddist að Þverbrekku í Vestur-Landeyjahreppi 1951 en hann er sonur hjónanna Hannesar Guðnasonar bónda og Hólmfríðar Júníusdóttur eiginkonu hans. Þeim Hannesi og Hólmfríði varð ekki fleiri barna auðið, reyndar lést hún við fæðingu Guðna.

Guðni hlaut venjubundið uppeldi hjá föður sínum og þrátt fyrir móðurleysið dafnaði hann vel enda tók ráðskona föður hans að Þverbrekku, að nafni Þóra Oddsdóttir við móðurhlutverkinu. Hún mun einnig hafa tekið við öðrum hlutverkum sem áður voru í höndum Hólmfríðar móður Guðna. Níu ára gekk hann í skóla í gamla félagsheimilinu í Njálsbúð en þar lærði hann undir handleiðslu Ómars Ómarssonar farandkennara, sem reyndar var hálfbróðir Hannesar föður Guðna. Þar lærði Guðni móðurmál, latínu, algebru og danska tungu, auk hannyrða. Það var því vel lesinn ungur maður sem gekk vorið 1965 til prestsins að Krossi, sr. Tyrfings T. Tyrfingssonar (föður sr. Tyrfings sem einnig mun rita pistla á þessari vefsíðu), en hjá honum lærði hann bænir og húslestur. Guðni fermdist um hvítasunnuna sama ár og fór í framhaldi á vit ævintýra í höfuðstaðnum Reykjavík. Borgin heillaði Guðna aldrei og með bítlaklæddum jafnöldrum fann hann aldrei samleið. Það var því í lok júní sama sumar sem hann ákvað að aldrei skyldi hann yfirgefa heimasveit sína aftur. Þegar austur í sveitir kom hafði faðir hans flutt sig um set að Svaðbæli sem er austan við Markarfljót, reyndar í Leirnahverfinu í A-Eyjafjallahreppi. Síðan hefur Guðni æ kennt sig við Svaðbæli. Hann tók nú til við sveitastörf og hefur til dagsins í dag haft óþrjótandi áhuga á þeim málefnum og hefur ritað ótal greinar og pistla um efnið í Bændablaðið, Þjóðólf, Framsóknartíðendi, Rángæingaqóstinn og nú síðast Básinn, málgagn Félags kúabænda.

Guðni er ókvæntur og barnlaus en hefur eftir lát föður síns 1998 búið ásamt ráðskonu sinni og fóstru, Þóru að Svaðbæli. Þar rekur Guðni myndarlegt kúabú og hefur auk 300 fjár en hann hefur samhliða því unnið að þróunarverkefni í samvinnu við SLABB (Svenska lambe-, aliheste-, belje- och bændesamtakene) og Rannsóknarstofnun landbúnaðarins að Keldum.

Úr handraðanum: Saga Jubbblasamtakanna 3. hluti

2005-04-11T22:52:00.000Z

Jubbblasamtökin höfðu þarna á skömmum tíma eflst mjög og urðu fljótlega afar áberandi á mjög mörgum sviðum íslensks menningasamfélags. Meðlimir samtakanna létu til sín taka á flestum listasviðum og létu sig varða allt það er við kom sköpun menningaverka ýmiskonar. Sem dæmi má nefna, að haldnar voru listasýningar af margvíslegum toga, s.s. erótískra ljósmynda, frímerkja, gjörninga ýmissa og jafnvel óperur. Má því segja að lista- og menningaflóra þjóðarinnar hafi staðið í miklum blóma, á þessum tíma, þökk sé meðlimum samtakanna.
Snemma varð ljóst að rekstur Jubbblasamtakanna kallaði á aukið fjármagn frá opinberum aðilum. Ársgjöld meðlimanna þriggja dugðu engan veginn til þeirra daglegra útgjalda sem reksturinn kallaði á og sem dæmi má nefna að það rekstrarfé sem samtökin höfðu yfir að ráða þetta fyrsta ár, nýttist til fullnustu. Var þar aðallega um að ræða fjármagn til almenns reksturs, auk greiðslna kaffiveitinga á einum fundi samtakanna er haldinn var í veitingasal Norræna hússins í Reykjavík. Var því, í rauninni, ekki hjá því komist að óska eftir styrkjum frá hinu opinbera, ríki eða sveitafélögum en að vel athuguðu máli var ákveðið að byggja upp samtökin á eigin forsendum. Hefur það augljóslega verið gæfuspor mikið og ber vott um heilbrigðan þroska og sjálfstæði stjórnar samtakanna, sem ætíð hefur borið hag þeirra fyrir brjósti sér.
Uppi voru ýmsar ráðagerðir, af hálfu stjórnar, varðandi aukningu rekstrarfjármagns og voru til að mynda lagðar fram hugmyndir um fjölgun félagsmanna samtakanna. Er ekki að efa, að slík ráðstöfun hefði orðið rekstrinum mikil vítamínsprauta, enda hefði einn umfram meðlimur kallað til um það bil 33% fjármagnsaukningu. Ekkert varð þó af þessum áformum og telja samtökin því þrjá meðlimi enn þann dag í dag.

Fréttir: Æðstaráð Jubbblasamtakanna

2005-04-11T22:17:00.000Z

Eins og fram kom í síðustu viku var æðstaráð Jubbblasamtakanna endurdregin og verður starfsemi samtakanna því með óbreyttum hætti næsta árið. Hér að ofan má sjá mynd af æðstaráðinu, frá vinstri Elís Anton framkvæmdastjóri fjármálasviðs og reikningshald, Garðar Jónsson forseti og Helgi Jónsson aðalritari.

Úr handraðanum: Andlegt heilbrigði!

2005-04-11T21:58:00.000Z

Eftir Elís Anton Sigurðsson

Gagnrýni á framlag formanns Jubbblasamtakanna Helga Jónssonar á tveimur listakvöldum 1995

Ekki efast ég um að Helgi Jónsson telji sig meðvitaðan um listræna hæfileika sína þó svo að öðrum séu þeir gjörsamlega duldir.
Á fyrra listakvöldi samtakanna leggur Helgi fram erindi sem nefnist því háfleyga nafni “Hinn hárbeytti sannleikur”. En sannleikur þessa klúra erindis er sjálfsagt eins mikill og að einhvern tíma hafi verið haldin mannréttindaráðstefna í Hanuicesque á Sri Lanka því að ég efast stórlega um að eitthvað sé til á Sri Lanka sem nefnist Hanuicesque. Helga er hrein vorkunn að hafa látið aðra eins illa skrifaða vitleysu frá sér fara á rituðu máli og maður stórefast um andlega heilsu hans eftir að hafa lesið þessa grein. Ég spyr, ef þetta er hinn hárbeitti sannleikur, hvernig lítur þá lygin út á prenti hjá formanninum?
Á sama kvöldi leggur Helgi fram verk í formi ljóða bæði í hefðbundnu ferskeytluformi og frjálst fram sett. Sum ljóðin eru sæmilega ort en með heldur lélegt efnisinnlagi. En loksins þegar ég hélt að eitthvað sæmilegt væri á ferð hjá þessum slælega höfundi klikkir hann út með þvílíkri smekkleysu í ljóðinu “Hella” að það varðar við landslög.
Í þessu ljóði ræðst Helgi að frændfólki sínu og fyrrverandi sveitungum og kallar þá vesalinga, drullusokka, kynvillinga og drykkjurúta, svo eitthvað sé nefnt. Ekki veit ég hverju Helgi varð fyrir á sínum uppvaxtarárum fyrir austa, en eitt er víst að andlega heilbrigt fólk lætur ekki svona lagað frá sér fara á prentuðu máli.
Á seinna listakvöldinu sannar Helgi svo ekki verður um villst að eitthvað alvarlegt er að í hans sálarlífi. Þetta kvöld hafði yfirskriftina “Dónakvöld” en öllu má nú ofgera. Á þessu kvöld leggur Helgi fram verk í formi ljóða annars vegar og “erótískrar” myndasýningar hins vegar. Ljóðið sem hann leggur fram heitir “Dónaskapur” en í því er engan dónaskap að finna heldur aðeins brenglaðan hugsunarhátt höfundar. Í ljóðinu segir m.a. “Eftir að hafa makað kúknum á mig og nuddað honum í andlitið á mér, ...” Eins og sjá má er manngreyið stórbrenglað á geði og þörf á hjálp sérfræðinga. Ekki tók betra við þegar myndir Helga komu til sýningar. Þar ber að líta illa teiknaðar og afskræmdar myndir af beru fólki í annarlegum stellingum svo hrikalegar á köflum að mér varð óglatt.
Fyrir þessi verk fær Helgi ekki eina einustu stjörnu þar sem stíllinn er lélegur, efnið þunnt og smekkur höfundar meira en lítið brenglaður.

Þessi grein birtist í desemberhefti Alberts, málgagns Jubbblasamtakanna 1995.

Fréttir: Jubbblaleikarnir 2005

2005-04-11T21:57:00.000Z

Nú hefur verið ákveðið að Jubbblaleikarnir verða í fyrsta skiptið haldnir í sumar. Jubbblaleikarnir eru eins konar tugþrautarkeppni sem aðeins meðlimir Jubbblasamtakanna hafa aðgang að, og felast í keppni í óhefðbundnum íþróttagreinum eins og skák, bogfimi, keilu, golfi, krikketi o.fl. eftir fyrirfram ákveðnu stigakerfi. Keppnin, stigaútreikningar og fyrirkomulag keppninnar verður kynnt betur er nær dregur en ljóst er að hún mun vekja mikla athygli um heim allan.

Úr handraðanum: Gömul ljóð

2005-04-10T22:13:00.000Z

Hér getur á að líta gömul ljóð, eftir meðlimi Jubbblasamtakanna, sem ekki hafa birst áður en ætluð voru til birtingar í málgagni samtakanna Alberti. Ljóð þessi eru að öllum líkindum frá árinu 1996.

Bernskubrek loðnunnar (e. Elís Anton Sigurðsson)

Hvar er loðnan?
Er hún í sólbaði?
Eða er hún að eltast við úrkynjun
íslenska hundsins

Tjaldborg tjallans (e. Garðar Jónsson)

Er Lára ekki sæmilega hraust?
spurði Hannes um leið og
hann kastaði kveðjunni í mig
Dr. Þórir saumaði 12 spor

Vor (e. Helgi Jónsson)

Þegar sumarið kom yfir sæinn
kláraðist kexið

Úr handraðanum: Saga Jubbblasamtakanna 2. hluti

2005-04-10T18:56:00.000Z

Stofnfundurinn var, eins og áður er getið, haldinn sunnudaginn 29. október á heimili Helga, að Eggertsgötu 4, sem síðar var gert að opinberum heimkynnum samtakanna. Voru þar mættir allir upprunalegu stofnendur samtakanna auk Helga, þeir Elís Anton Sigurðsson og Garðar Jónsson. Kosin var bráðabirgðastjórn til næsta aðalfundar og var hún skipuð eftirfarandi aðilum; Helgi Jónsson, 26 ára, íslenskufræðinemi var kjörinn formaður, Elís Anton Sigurðsson, 24 ára, bankastarfsmaður var kjörinn gjaldkeri og Garðar Jónsson, 26 ára, tækniteiknaranemi var kjörinn ritari. Ekki var um formlega kosningu að ræða heldur völdust aðilar fremur eftir aðstæðum þeirra og tíma í embætti sín. Þannig var Helgi kjörinn formaður vegna tölvueignar sinnar en samkvæmt lagafrumdrögum hans var það hlutverk formanns að sjá um daglegan rekstur Jubbblasamtakanna. Elís starfaði sem bankagjaldkeri á umræddu tímabili og var því í rauninni sjálfkjörinn til að annast fjármál samtakanna og ritarastarfið kom því í hlut Garðars enda fullskipað í önnur stjórnarembætti. Ennfremur var ákveðið að fyrrgreindir stjórnarmenn hefðu yfir að ráða valdi því er hæst yrði sett innan samtakanna og nefndist Æðstaráð.
Frumdrög laga og reglna samtakanna voru lögð fram, þau yfirfarin af lögfróðum aðilum, breytingar gerðar þar sem við átti og þau búin til undirritunar stjórnar, í endanlegri mynd, á verðandi aðalfundi. Einnig voru kynnt helstu markmið samtakanna, lögð fram tillaga um átrúnaðar- og verndargoð þeirra, Þrómiseifus og að loknum stífum fundarhöldum félagsmanna var boðið upp á kaffiveitingar og skemmmtiatriði ýmiskonar.
Lög og reglur samtakanna voru síðan samþykkt og undirrituð á aðalfundi samtakanna þann 26. nóvember árið 1995. Sá fundur var reyndar mjög átakamikill og var tekist á um ýmis mikilvæg málefni. Meðal þeirra helstu má nefna ágreining varðandi hugmyndafræði einstakra félagsmanna gagnvart samtökunum og frekari breytingar á lögum samtakanna sem þó var ákveðið að fresta um óákveðinn tíma. Málgagn Jubbblasamtakanna, Albert, var sett á laggirnar og lögð fram tillaga Garðars Jónssonar að merki samtakanna og það samþykkt til bráðabirgða.

Úr handraðanum: Hlutverk aldraðra

2005-04-10T12:32:00.000Z

Eftir Börð Wiium

Hvert er hlutverk aldraðra í listalífi í íslensku þjóðfélagi í dag? Samkvæmt nýafstaðinni könnun hjá Félagsvísindastofnun Háskólans á þátttöku aldraðra í listum kemur fram að einungis 8% karla á aldrinum 25-30 ára höfðu ekki hugmynd um hvort aldraðir stunduðu listir. Í samtali við nýskipaðan umboðsmann aldraðra kemur fram að þessi útkoma brjóti algjörlega í bága við aldraðrasamþykkt Sameinuðu þjóðanna þar sem kemur berlega í ljós að fólki á aldrinum 25-30 ára ber skylda til að hafa mjög víðtæka þekkingu á málefnum aldraðra hvað sem það kostar. Í 107. gr. þriðju málsgreinar samþykktarinnar kemur fram að refsing við vanþekkingu af þessu tagi sé allt að 50 ára betrunarvist á elliheimilinu Lundi á Hellu, en þó aldrei skemur en 10 ár.
Á þessu má sjá að brýnt er að fólk kynni sér betur listir aldraðra til að elliheimilin fyllist ekki af fólki á aldrinum 25-30 ára sem myndi aftur þýða að aldraðir kæmust ekki að og yrðu þar með heimilislausir.

Greinin birtist í desemberhefti Alberts, málgagns Jubbblasamtakanna 1995

Úr handraðanum: Saga Jubbblasamtakanna, 1. hluti

2005-04-09T12:26:00.000Z

Stofnun Jubbblasamtakanna má rekja, allt aftur, til seinni hluta tuttugustu aldarinnar. Nánar tiltekið til ársins 1987. Þá höfðu þrír ungir nemar frá Hellu á Rangárvöllum, þeir Helgi Jónsson, Elís Anton Sigurðsson og Garðar Jónsson, starfrækt litla sjónvarpsstöð TV DATA um skeið, með kvikmyndagerð í nafni Furðufilms sem aukagrein. Þessir framtakssömu menn höfðu einnig um alllangt skeið staðið að ýmis konar lista- og menningarstarfsemi sem aðallega var fólgin í myndlist, ljóða- og sagnagerð. Þótti þeim félögum ýmislegt ábótavant varðandi útgáfu og varðveislu íslenskrar menningar og tungu og vildu þeir gjarnan leggja sitt af mörkum til hagsbóta þeim málaflokkum. Þeir höfðu ávallt haft eflingu hins íslenska tal- og ritmáls að leiðarljósi og frá unga aldri starfað ötullega gegn hnignun íslenskrar menningar. Töldu þeir sig vera búnir að fá nóg af áhuga- og framtaksleysi íslenskra stjórnvalda varðandi mál þau er snertu varðveislu og grósku lista og ákváðu því að stofna öflug menningasamtök því til áréttingar. Samtökin voru skírð Jubbblasamtökin með svokallað "jubbbl" til hliðsjónar og voru formlegir stofnfélagar; þeir Helgi, Elís og Garðar. Ekki er alveg ljós formlegur stofndagur en telja má þó víst að hann hafi verið annað hvort fyrri hluta ársins 1987, ellegar þann seinni.
Samtökin voru mjög öflug þessa fyrstu tvo, þrjá daga en fljótlega varð þó smávægilegt hlé á starfsemi þeirra sökum mikilla anna stofnfélaganna þriggja. Þeim til málsbóta verður þó að geta hve annir þær voru að miklu leyti tengdar öðrum lista og menningaviðburðum.
Samtökin voru því næst endurreist, með stofnfundi, þann 29. október árið 1995. Sá fundur átti sér nokkurn aðdraganda en Helgi Jónsson hafði þá um alllangt skeið unnið að endurvakningu samtakanna samhliða íslenskufræðinámi sínu. Sá aðdragandi var að mestu fólginn í vinnslu frumdraga um lög og reglugerðir samtakanna auk greinagerða um markmið þeirra og störf.

Úr handraðanum: Þrómiseifus - Fyrsti hluti

2005-04-09T11:14:00.000Z

Eftir dr. Þórarin Bergberg

Eins og komið hefur fram er gríska lista- og menningargoðið Þrómiseifus átrúnaðargoð Jubbblasamtakanna. En hver var þessi Þrómiseifus? Eða var hann yfirleitt bara eitthvað annað er goðsögn? Í þessari grein minni mun ég leitast við að svara þessum spurningum um þennan mæta mann.

Þrómiseifus er nú á síðari tímum talinn eitt merkasta trúartákn grískrar goðafræði. Hann er talinn hafa verið uppi á tímum Lotusar mikla konungs á einni af eyjum Polynesiu og hans er m.a. getið í Snorra Eddu. Mönnum ber þó ekki saman um þessi atriði því að í einum af ritum heimspekingsins Plató er minnst á hann sem eins af frumkvöðlum Voycurismans sem eins og allir vita kom ekki fram fyrr en á öndverðri 3. öld. Og bæði Sódóma og Gómmóra segja hann einn af ástmönnum Venusar sem var uppi u.þ.b. 1200 f.Kr. En þetta eru þó atriði sem ég tel ekki skipta sköpum í þessu tilliti.

Þrómiseifus er talinn vera af ætt Argotida og voru foreldrar hans bæði þrælar hjá konungi Hydroníu. Hann átti að öllum líkindum góða æsku ef litið er til þeirrar geysilegu atferlisdýrkuna og menningarumbóta er áttu sér stað í Hydroníu á þessum tímum. Franski listfræðingurinn Pierre Quandoooo segir í bók sinni Le' medicech Lapoer að Þrómiseifus hafi strax á unga aldri aðhyllst roastbeefisma sem eins og allir vita lýsir fullmótuðum kenningum um réttlætiskröfu viskunnar.

Eftir að hafa komist til vits og þroska barðist hann fyrir þjóð sína Hydroníu gegn nágrannaríkjum sínum Gológníu og Kungfú en sú barátta dugði ekki til. Á þessum tímum voru herir Hydroníu ekki eins öflugir og verið höfðu og fór veldi ríkisins hnignandi og leið undir lok undir það síðasta. Þrómiseifus fór ekki varhluta af þeirri baráttu því í stríðum þessum missti hann tvívegis fót. Hann var svo tekinn til fanga af Gológnum en með lymsku og lævisku roastbeefismans tókst honum að leika á varðmenn konungs Gológníu en sú barátta kostaði hann hægri höndina. Í ritum heimspekingsins Socratesar er þess getið að Þrómiseifus hafi misst báðar hendur í þessari baráttu en ég dreg það stórlega í efa. Eins kemur þetta skýrt fram í Völuspá, sem að mínu áliti stenst engan veginn sökum óáreiðanleika þeirra sagna.

Þrómiseifus flúði til Berudíu og komst þar til valda á skömmum tíma. Á þessu tímabili er talið að kenningar Þrómiseifusar hafi einkalega mótast af huglægu rótleysi. Hann drottnaði yfir Berudíu til dauðadags, í líklega ein 30 ár og þótti með ólíkindum hve lengi hann hafði völd. Þrómiseifus hefur líklega látist á sextugsaldri aðeins 43 ára að aldri þó ekki séu allir á eitt sáttir um það.

Fyrrnefndur Pierre Quandoooo segir í sinni bók að skv. fönixísku tímatali hafi Þrómiseifus náð a.m.k. 130 ára aldri og má það vel vera. Þess ber einnig að geta að við bálför Þrómiseifusar sprakk hann í loft upp að öllum líkindum af völdum protangass sem myndast einungis við þær aðstæður að mjólkursýrur ná jónísku efnasambandi við þindarslím og við visst hitastig sýrulímsins myndast mjög eldfimt gas. Þrómiseifus komst í goðatölu u.þ.b. 200 árum eftir dauða sinn og víða um heim prýða styttur af líkama hans sýningarsali.

Þessi grein birtist í Alberti, málgagni Jubbblasamtakanna - desemberblaðinu 1995

Fréttir: Gamalt og nýtt efni Jubbblasamtakanna

2005-04-09T11:08:00.000Z

Hér á vefsíðu Jubbblasamtakanna verður gamalt efni í bland við nýtt sett inn í framtíðinni. Gamalt efni eru t.d. greinar, gagnrýni, ljóð og hvað annað er hefur birst í málgagni samtakanna, Alberti, ennfremur er ýmislegt eldra efni sem ekki hefur komist fyrir sjónir almennings auk auðvitað nýrra efnis. Sá liður sem inniheldur eldra efni mun bera yfirskriftina Úr handraðanum, og er ekki að efa að þar mun margt athyglisvert koma fram.

Fundargerð aðalfundar 2005

2005-04-08T21:03:00.000Z

Aðalfundur Jubbblasamtakanna, haldinn í sal samtakanna að Langholtsvegi 52, þann 7. apríl 2005.

Garðar Jónsson formaður setti samkomuna og að henni lokinni tók Helgi Jónsson ritari við fundarstjórn. Hann notaði tækifærið og gagnrýndi harðlega fundarboð formanns en ekki hafði verið boðað til þess með löglegum hætti, þ.e. með viku fyrirvara. Formaður vildi ekki kannast við að eitt eða neitt og vísaði í fundarboðið þar sem stóð “með fyrirvara um prent- og stafsetningarvillur” og vildi þar með meina að dagsetning bréfahauss væri einfaldlega vitlaus. Ritari framvísaði þá niðurstöðubréfi frá Efnagreiningarsambandi Íslands sem tók af allan vafa og sannaði hvenær bréfið var ritað. Ekki verður aðhafst meira í málinu.

Næsta mál á dagskrá var undirritun laga Jubbblasamtakanna eftir breytingar á aðalfundi 25. mars 2004. Lögin voru samþykkt og undirrituð án frekari skoðunar og bíða nú fjölföldunar.

Þriðja mál var dreging í stjórn og nefndir. Garðar Jónsson var endurdreginn formaður en Elís Anton Sigurðsson dró ritaraembættið, Helgi Jónsson dró a.á.m. gjaldkerann. Þeir tveir síðastnefndu ákváðu að skipta um embætti enda er það fullkomlega löglegt skv. lögum samtakanna. Æðstaráð mun því vera óbreytt næsta árið, Garðar Jónsson mun gegna formennsku (eða embætti forseta eins og það heitir eftir lagabreytingar), Elís Anton verður áfram gjaldkeri (framkvæmdastjóri fjármálasviðs og reikningshald, eftir sömu breytingar) og Helgi Jónsson verður áfram ritari (aðalritari skv. lagabreytingum). Ekki var dregið í nefndir að þessu sinni.

Fjórða mál fundarins, ársreikningar síðasta árs lagðir fram, féll um sjálft sig þar sem ekki hafði gefist tími til að vinna ársreikningana í tíma vegna knapps undirbúnings og aðdraganda fundarins sem skrifast eingöngu á vanrækslu forseta.

Önnur mál voru eftirfarandi:
- Breytingar á lögum samtakanna. Engar breytingar bárust fundinum að þessu sinni.
- Ræddar tillögur um íþróttamót samtakanna á komandi sumri. Æðstaráð skipti með sér verkum vegna þess en ráðgert er að keppa í tíu greinum.
- Myndataka.

Fleira var ekki á dagskrá og fundi slitið

Garðar Jónsson (sign)
Elís Anton Sigurðsson (sign)
Helgi Jónsson (sign)

Fréttir: Aðalfundur 2005

2005-04-08T13:19:00.000Z

Aðalfundur Jubbblasamtakanna var haldinn í gær, fimmtudaginn 7. apríl. Dregið var í Æðstaráð og var Garðar Jónsson endurdreginn formaður samtakanna með miklum yfirburðum. Elís Anton Sigurðsson hlaut ritaraembættið og Helgi Jónsson gjaldkerastarfið en þeir skiptu innbyrðis eins og lög og reglugerðir Jubbblasamtakanna kveða á um að megi, og er því Æðstaráð eins skipað annað árið í röð. Fundargerð aðalfundar verður sett inn á næstunni.

Fréttir: Vefur Jubbblasamtakanna opnaður

2005-04-08T10:29:00.000Z

Lista- og menningarfélagið Jubbblasamtökin hafa nú opnað vefsíðu í þeim tilgangi að opna almenningi aðgang að þeim. Til þessa hafa samtökin verið lokuð almenningi og útgáfa afurða þeirra bundin við málgagn þeirra en héðan í frá mun almenningur geta kynnt sér þær, lesið sig til um lög og reglur þeirra og fræðst um starfsemi þeirra. Á næstunni verða ýmsar upplýsingar færðar smám saman inn á vefinn.